Гоо узэсгэлэнтэй ухаалаг бусгуйчууд

Ингэхэд эрчүүд ухаантай эмэгтэй чүүдэд хэрхэн ханддаг юм бол? Тэд ухаалаг эмэгтэйчүүдийг өөрөө өөрсдийнхөөрөө л хүлээж авдаг. Ухаалаг, дээр нь царайлаг бол эрчүүдийн сонирхлыг татаж чаддаг. Харин ухаалаг хэрнээ гадаад үзэмж тааруу бол бас л асуудал гардаг байна. Мэдээж хэрэг эр хүн болсон хойно эмэгтэй хүний гоо үзэмжийг харах нь дамжиггүй юм. Дашрамд хэлэхэд ямар ч эр хүн нүдээрээ дурладаг нь үнэний ортой гэнэ шүү. Гэхдээ эмэгтэй хүн байгалиас гоо үзэсгэлэнтэй, ухаалаг байдлыг нэгэн зэрэг өвлөж төрсөн бол хувийн амьдрал нь тийм ч амар байдаггүй бололтой. Иймд юуны өмнө нэр томьёоны асуудлын учрыг олох гэж оролдоорой.

Тэгвэл ухаантай эмэгтэй гэж хэнийг хэлэх вэ? Үүнд: эхний ээлжинд энэ тодорхойлолтыг эрчүүд өөрсдөө өгдөг. Харин эрчүүдийн нэг хэсэг нь  тэднийг маш их өргөн сонирхолтой, бүхнийг мэддэг, бас чаддаг, юмыг дүгнэн шинжих ухааныг сайтар эзэмшсэн, биеэ даасан, бодит байдлын сайн муу талыг мэддэг, олон хүнтэй харьцаж чаддаг, албан тушаалд ч  гэсэн  үргэлжид  амжилт гаргадаг нэгэн гэж үздэг бол нөгөө нэг хэсэг нь тэвчээртэй, ямар нэгэн таагүй харьцааны үед буулт хийж өгөхдөө амархан, нөхцөл байдалд дасан зохицож чаддаг, дурын сэдвээр чөлөөтэй ярьдаг, өөрийн эр хүний сайн талыг дээд зэргээр үнэлж чаддаг хэмээн үздэг. Энэ төрлийн эмэгтэйчүүдийг "төмөр хатагтай" хэмээн нэрлэдэг тал бий. Тэднийг хайрлахаасаа илүүтэйгээр хүндлэх нь их байдаг.

Ухаантай байлаа гэдэг чинь муу хэрэг биш шүү дээ. Заримдаа эрчүүд хэт ухаантай бүсгүйчүүдээс айдаг. Тиймээс бүсгүй танд гэж хэлэхэд өөрийн хайртай, таалагдсан залуугаа айлгахгүйн тулд ухаалаг зан чанараа үргэлж биш ч гэлээ цагийг нь олж гаргах нь илүү тохиромжтой байдаг.

Дашрамд нэгэн сонирхолтой зүйлийг дурдахад, Чингисийн үед эмэгтэй хүний "хатан ухаан" төрийн хэрэгт багагүй хувь нэмэр оруулж байсан гэдэг шүү.

Zindaa.mn-Үндэсний чөлөөт мэдээллийн портал

ТАГТАА

Өчигдөр орой тэнгэр бүрхэж ширүүн бороо цутгасан уйтгартай орой байлаа. Гэнэтхэн цонхоор нэг тагтаа нисээд ороод ирэх юм. Харвал хар хөх өнгийн мөнгөлөг сортой далавчтай, цагаан хошуутай хөөрхөн тагтаа байлаа. Тэгж байгаад буцаад нисээд гарчих байхдаа гэж бодож байтал өнөөх тагтаа шууд над руу чиглэж нисэж ирээд толгой дээр минь нэг бууснаа намайг айгаад хашгирч үргээснээс болсон уу сандран гэр дотуур нисээд өрөөний буланд очоод суучихсан. Хөөрхий дөө яагаад манай гэрт ороод ирж байгаа юм болдоо, тэнгэрийн илч юм байлгүй дээ гэж ээж маань билэгшээнэ.
Өнөөх тагтаа миний өрөөний үүдэнд ирээд суучихлаа. Би нисэхээр нь айгаад ойртож чадахгүй байлаа. Будаа цацаж өглөө идсэнгүй. Тэгтэл бүүр өрөөнд минь ороод ирлээ. Би айгаад л байх юм. Яагаад юм бол ядаж байхад манай гэрийн бүх эрэгтэйчүүд ийшээ тийшээ явчихсан байдаг.  Тэгж тэгж зориглоод ванны алчуур дээрээс нь хаяж байгаад барьж авахаар шийдлээ. Бас л чадсангүй. Тагтаа миний өрөөнд эсвэл миний өрөөний үүдэнд суусаар би компьютер асааж жаал дуу сонсож суулаа. Бас тагтаа тэжээдэг хүний тухай уншлаа. Тэжээж болох л юм байна даа гэж бодлоо. Тэгж байтал дүү минь ирээд өнөөх тагтааг барьж аваад фалкон дээр гараад нисгэх гэсэн  боловч алган дээр нь суугаад л байлаа. Ниссэнгүй ээ. Ээж албадаж битгий гарга аа хөөрхий амьтан нисэхгүй бол оруулаад ир байж л байг гээд л. Ингээд тагтаа манайд хонолоо.  Өглөө босоод харин хүчээр цонхон дээр гаргасан даа. Хөөрхий эрх дураараа нисэж яваг дээ. Би хараад л байлаа. Хэзээ явах нь вэ гээд  Нилээд удаан байж байгаад нэг харсан явчихсан байна лээ. Хөөгөөд явуулчихлаа гэж гомдсон болов уу . Арай үгүй байлгүй дээ. Дуртайяа нисэн одсон биз. Харин би өрөө гагргачихаад  нисээд явчихаар нь гомдмоор ч юм шиг санагдлаа. Тэгсэн чинь тагтаа айлд орж ирэх их сайн байдаг гэнээ. Хэн нэгэн сайн хүн ирэхийн дохио гэнэ ээ. Нээрээ ч ээжийн хэлдгээр тэнгэрийн элч ирсэн юм болов уу.    

СЭТГЭЛДЭЭ ДУУЛЪЯ

Дөлгөөхөн нүдийг чинь бодохоор би 

Дэргэд чинь байхыг хүсдэг дээ

Дураар болдоггүй хорвоодоо 

Дуулж л дуулж л явъя даа хоеулаа

Ярихыг чинь сонсоод суухдаа

Яагаад сэтгэл  дэнслэнэ вэ

Янагхан зангий чинь санахаараа

Яагаад яагаад зүрх догдлоно вэ

 

Зүрх зүрхээ  бэдрэн догдолсон

Зүүд зүүдэндээ жаргалтай

Зөнгөөр учирсан чамайгаа

Замлин хорвоодоо дуулж л явья даа

Санаад л санаад л байх юм даа

Цэрвүүхэн зүүд шиг өдрүүдээ

Салахын жолоогүй энэ хайраа

Сэтгэлдээ сэтгэлдээ дээдэлж  явъя даа

Дүүрэн бодолгүй хорвоодоо

Дандаа оройтож байя даа

Дэндүү дассан дүрийг чинь

Дуундаа  дуундаа дурсаж явья даа

Салж л чадахгүй энэ хайраа

Сэтгэлдээ сэтгэлдээ дуулж л явъя даа

УРАН ШУВУУНЫ АМЬДРАЛ-11

Бурхан Уран шувуунд дурлаад энэ хайрандаа үнэнч хэвээр хэдэн зуун жилийг үдсэн ч Уран шувуу зөвхөн Амьдралд л хайртай хэвээрээ. Тэгээд Бурхан нэг өдөр Уран шувуунаас асуужээ.  Яагаад,  Яагаад чи Амьдралд ийм хайртай байдаг юм бэ гэсэнд Уран шувуу:

Энд маш олон хариулт байна даа.  Амьдрал бид хоёрын хайр хичнээн урт удаан  үргэлжилж байгаа ч би Амьдралаас уйддаггүй.  Амьдралд би үргэлж хайртай байдаг.  Яагаад гэвэл  Амьдрал надад жаргал ч бай зовлон ч бай  миний л амсах эдлэх, туулах ёстой тэр зүйлүүдийг өгдөг. Тэр нь надад  үргэлж ухаарал, тэсвэр тэвчээр,  жаргал, баяр бэлэглэдэг.  Тэдгээрийн дотор ахиад л, бас дахиад л, бүр улам бүр эрч хүч, урам зориг өгдөг, баяр баясал төрүүлдэг нандин сайхан учрал тохиолууд олон байдаг учир АМЬДРАЛД би хайртай байдаг юм даа гэж хариулжээ.

ЗҮГЭЭР Л НЭГ АМЬДРАХ ЮМСАН

Зүгээр л нэг амьдрах юмсан
Зүлгэн дээр гэрээ бариад . . .
Зүү утас нийлүүлэн хүүдээ дээл оёж
Амрагаа хүлээж
Амраг минь адуунаасаа ирж
Зүгээр л нэг амьдрах юмсан . . . 

Ц.Хулан. 

Гунигийн бороо зүрхэнд шивэрсэн ч сэтгэлийн чинь нөмөрт дулаацна

Гунигийн бороо зүрхэнд шивэрсэн ч

Сэтгэлийн чинь нөмөрт дандаа л дулаацсан

Амьдралын салхи бодлыг чинь дүйсэн ч

Алдарч үзээгүй итгэл хөглөсөн

Хатуу бүхнээс халгаж бүдэрэхэд

Хайраараа аргадан намайг чи тоссон

Амьдралаас юунд ихийг хүсээ вэ 

Аз жаргал ойрхон л байж дээ

Тэгтлээ их хайсан тэр аз жаргалынхаа

Тэвэрт нь би өөрөө ямар их төөрөө вэ

Хорвоогоос юунд ихийг хүсээ вэ

Хүсэл мөрөөдөл ойрхон л байж дээ

Дэндүү их хайсан тэр аз жаргалынхаа

Дэргэд нь би өөрөө ямар их төөрөө вэ

ААВДАА ХЭЛЭХ ҮГ

Хонгорхон бүсгүйчүүд, энхрий бяцхан үрсийн насан туршийн жаргал, зовлонгийн шидэт дохиурыг атгасан  хорвоогийн бүх ААВУУДАД зориулав. 

Харуусал дагуулж зовлон тээх орчлонгоос

Хамгаалж чадах ганцхан түшиг минь та байтлаа

Хундагахан дарсанд хувь заяагаа даатгуулан

Хөөрхий ээжийн минь нулимсыг барж суухад

Амь болсон сэтгэл минь дотуураа хичнээн нурсанч  

Алга дарамхан зүрхэнд минь Та, бурхан болж төрдөг шүү.  

Алдаа онооныхоо дэнсийг эргээд нэг харахгүй бол 

Араас чинь бэдрэх хүү чинь бүдэрчихвий дээ, Ааваа

Жижигхэн байхад эрхлүүлдэг хүүхэд насны жаргалыг  

Жирийн өдрүүдтэй нь хамт эргүүлэн авчрахгүй юм бол

Жаахан хүү чинь нэг л өдөр бүдрэхэд  

Жүнзтэй дарсны амсар ойрхон байна аа, Аав минь.

Цонхны цаанаас зүрхээн урсган хүлээдэг  

Цомбон сэтгэлдээ нулимсаараан зүсэн зогсдог

Марал нүдэн хүү чинь мөргөн мөргөн гуйж байна. 

Маргааш орой эрүүл ирээрэй, Ааваа

УРУУЛЫН ХЭЭГЭЭР СҮЛЭН БАЙЖ УЧИРСАН АМРАГ МИНЬ ...

ЗҮРХНИЙ ЦЭЦЭГХЭН ЧАМДАА

Зүүдэн тэргэл алсын дэглий цэнхэр уулсаас

Зүрийн  гөрөөс цахилах шиг цагаанхан манан сарнилаа ч

Зүрхний аглагт эрхэлсэн  шүүдэр цэцэгхэн чамайгаа

Зүгээр нэг л мартаж чадахсан бил үү дээ хорвоо

Уруулын хээгээр сүлэн байж учирсан амраг минь дээ

            Уянга хайрын орчлон зүрх  шиг ганц л байх юм аа

Үүлсэнд эргэх тэнгэрийн үрээ шаргал наран

Өлмийд гандах цэцэгсийг орхиод нэг л холдлоо ч

Өрцөн цаана минь нялхрах энхэр цэцэгхэн чамайгаа

Үйлийн зоргоор мартаж чадахсан бил үү дээ хорвоо

Уруулын хээгээр сүлэн байж учирсан амраг минь дээ

            Уянга хайрын орчлон зүрх шиг ганц л байх юм аа

Үелэн үелэн намрын үүлэн тэнгэр эсгээд

Уринаар ирсэн шувууд хоргодон хоргодон буцлаа ч

Нууцхан сэтгэлийн хавраараа дэлбээлж гэрэлтсэн чамайгаа

Нулимсан дотроо мартаж чадахсан бил үү дээ хорвоо

Уруулын хээгээр сүлэн байж учирсан амраг минь дээ

            Уянга хайрын орчлонд зүрх  шиг ганц л байх юм аа

Сайхан ээжүүд бүсгүйчүүд охидууддаа баярын мэнд хүргэе

Уяхан аашинд чинь хатуу бүхэн зөөлөрч
Уран хоолойд чинь сэтгэл бүхэн нялхарч
Бүүвэйн зөөлөн дуунд чинь үр бүхэн тайвширч
Бүсгүй хүний эрдэм агуу төгс билээ
Хатуудаа хатуу хорвоогийн
Хахирган аашийг зөөллөх
Хатангоо бүсгүй танд эх үрсйин баярын мэнд хүргэе.
Сэтгэлд чинь сүү өөрөө асгарч байг
Харцанд чинь хорвоо өөрөө гэрэлтэж байг
Алганд чинь цэцэгс өөрөө дэлбээлж байг
Зүүдэнд чинь бурхад өөрсдөө бүжиж байг
Сайхан ээжүүд бүсгүйчүүд охидууддаа баярын мэнд хүргэе

Блогийн гишүүд бичиж байна. ХАЙРТАЙ ЧАМДАА

Дээр үед бичсэн шүлгээ багшийнхаа блог дээр тавьж та бүхэнд толилуулмаар санагдлаа 

        Амлалт хайрыг минь дээдэлж, 

Алдхан бие сэтгэлийг минь зовоолгүй 

Ариухнаас ариухан амьдралын минь зулыг 

Амин эрдэнэ шигээ хайрлаж тэтгээрэй. 

       Сэтгэлдээ зөвхөн намайг л санан 

Итгэлээ ганцхан наддаа л үлдээж 

Эрч хүчийг энэ биеээс минь мэдэрч

Эрээлэшгүй их сэтгэлийн жаргалд умбагтун 

        Хайраа.... хайрыг минь хүндэл 

Харцыг минь жаргаа 

Хагацлыг минь үргээ...

Дурлал хайрын бурхан минь
Хамаг муу бүхнийг өнөөдрөөс эхлэн цэгцэлж,
Үргэлж сайн сайхны төлөө хамтдаа 

С.Баярмаа. 2004 он.

ОДОД АЗ ЖАРГАЛЫН ӨНГӨ АЯСТАЙ

“Алаг эрээн хорвоо түмэн янзын бартаатай

Тэмцэлгүй амьдрал гэж хаа ч үгүй болохоор

Тэрнээс гадуур явахыг би ч бас хүсэхгүй”   . . . гэж хэний шүлэг билээ дээ. Өнөө өглөө гэнэт л санаанд минь орж ирлээ. 
Баяр жаргал, зовлон гуниг хосолсон амьдралын минь замд түмэн янзын одод гэрэлтэнэ.  
Заримыг нь би урьд нь олж хараагүй байсан юм биш биз. Зарим нь эрж хайж явсан тэр од  минь биш биз.  Бодлын харгуйг гэрэлтүүлэн гийх энэ л оддоос хичнээн их гэрэл гэгээ цацрана вэ. . .  Тэрхүү гэрэл гэгээ дандаа л аз жаргал, аз хийморь,  амжилтын өнгө аястай бус уу. . .   

БЛОГИЙН ГИШҮҮД БИЧИЖ БАЙНА.

Бүжидмаа багш маань Монгол эх орныхоо ирээдүй нь болсон үр хүүхдийнхээ нийгмийн амьдралын сайн сайхны төлөө санаа тавьж, түүнийгээ чөлөөтэй илэрхийлж  явдаг гайхалтай сурган хүмүүжүүлэгч нэгэн. Иймээс багшийнхаа блокт өөрийн хүүгийн бичсэн энэхүү эссэ илтгэлийг тавья гэж бодлоо.  Миний хүү өнөөдөр 13 настай. Нийгмийн амьдралын болж бүтэхгүй бас болж бүтэж байгаа талаар өөрийн санал бодлоо бичсэн нь энэ л дээ.  Би ч гэсэн хүүгээ дэмждэг. Хүүгийн маань бичсэн энэхүү илтгэл эссэ сургуулийнхаа илтгэлийн уралдаанд түрүүлсэн бүтээл нь.

Иймээс эрхэм уншигч таныг хүүгийн минь бичсэн энэ эссэгээс нэгийг бодож хоёрын эрэгцүүлнэ гэдэгт итгэлтэй байна.

Уншигч та таалан болгооно уу.

УРАН ШУВУУНЫ АМЬДРАЛ-10

Уран шувуу бурхнаас  хүч чадал гуйсан тэр нь хэрхэн шийдэгдсэн тухайгаа бодсоор нэг мэдэхэд унтаж орхисон байв. Харин  өглөө сэрэхэд сэтгэл санаа нь сэргээд нэг л сайхан болсон байлаа.  Тэгээд гадаа гартал нар маш сайхнаар тунгалаг, хурц гэрэлтэж байлаа. Тэсэлгүй нүд нь гялбаж, харж чадалгүй гараараа сүүдэрлэх гэсэн боловч яг энэ үед Амьдрал дэргэд нь хүрч ирээд “шувуухай минь гэрэлт тунгалаг нарын өөдөөс зоригтой хар. Яг энэ үед өнгөрсөн бүхэндээ харамсаж зогсолгүй ирээдүйгээ бод. Чамд тохиолдсон бүхэн сайны төлөө болдог юм. Чамд тохиолдож буй сорилт, бэрхшээл, алдаа,  зөрчил, ялалт, ялагдал, өөрчлөлтийг сайн сайхан зүйлийн эхлэл гэж ойлгоорой”  гэжээ. Тэгсэн Уран шувуу: 
- Яахаараа алдаа, бэрхшээл, ялагдал хүртэл сайн сайхны эхлэл болно гэж би ойлгохгүй байна гэсэнд 
- Яахав дээ, түүнийг давж туулах хүч байгаа цагт  хүмүүс улам илүү хүчтэй,  чанга хатуу болдог юм даа.  Гэвч зарим хүн тэр дундаас уян зөөлөн сэтгэл, хайр энэрэл гэдэг зүйлээ ч гээж орхидог харин чи тэгж болохгүй шүү гэжээ. 
Гэтэл энэ үеэр тэр хоёрын яриаг далдаас сонсож байсан "Хар санаа" гэнэт гарч ирээд "Аанха  чи хэзээ нэгэн цагт  мөрөөдлөө алдаад хайж явсан байх аа. Би одоо чамаас юуг нь  чинь хулгайлахаа ойлголоо" гэж хашгирсанд Уран шувуу:  "Оролдоод үз л дээ амьдралд тохиолдсон бүхэн сайн сайхны төлөө болдог юм. Тэр чинь надад сайнаар ч тусах юм бил үү хэн мэдлээ" гэжээ. Энэ үед нар улам ч хурцаар ээж хорвоо дэлхийг тэр чигт нь гийгүүлж байгааг  тэрээр ажиглан бахдан харж зогслоо.  Нарны туяа хорвоо ертөнцийн эгэл бүхэнд ижилхэн тусч байгааг мэдэж байсан ч яагаад ч юм бэ энэ үед өөрийг нь илүү ивээж байх шиг санагдлаа.

УРАН ШУВУУНЫ АМЬДРАЛ-9

Уран шувуу нэг өдөр Бурханд “Найз минь би чамаасаа гуйх зүйл байна аа” гэж гунигтайхан хэлжээ. Юу тэр билээ би чинийхээ хүссэн болгоныг биелүүлнэ. Гагцхүү мөрөөдлийг чинь эргүүлж өгч чадахгүй шүү гэж нөгөө л хэлдэг үгээ Бурхан давтжээ. Уран шувуу:

-  “Тийм ээ би мэдэж байна. Өөр зүйл хүсмээр байна”  гэсэнд "Хэл л дээ" гээд  Бурхан Уран шувууг  хайр энэрэл шингэсэн нүдээр харсанд: 

- “Бурхан минь чи надад ХҮЧ ЧАДАЛ ХАЙРЛААЧ” гэжээ.
Бурхан бүүр гайхаж хоцроод... 
- "Чи юу хэлнэ вэ. Чамд гайхамшигтай их сэтгэлийн хүч тэнхээ байдаг шүү дээ чи тэрнийхээ хүчээр л мөрөөдлөө хайх урт удаан замыг туулж, дээрэмчдийн ертөнцийн хүнд бэрхийг давж чадсан шүү дээ" гэсэнд Уран шувуу:

- Үгүй дээ. Яг үнэндээ надад "ХҮЧ ЧАДАЛ" хэзээ ч байгаагүй. Тиймээс одоо би чамаас Надад хүч чадал хайрлаач гэж гуйж байна. Би мөрөөдлөө хайх замдаа өөр өөрийн өнгө аястай хорвоогийн түмэн жаргал зовлонг туулсан. Тэдгээрээс заримыг нь мартах, заримыг нь хаях, заримыг нь өнөөдөртөө авч явах, заримыг нь ирээдүйдээ  үлдээж тээж  явах эрдэнэс цуглуулсан юм. Одоо харин эдгээр эрдэнэс маань дэндүү их болчихоод дааж, үүрч  явж дийлэхгүй болоод байнаа. Иймд  надад Хүч чадал хэрэгтэй байна даа гэсэнд Бурхан:

- Чадахгүй нь дээ Уран шувуу минь гэж эрс шийдэмгий хэлэв. Уран шувуу нэг хэсэг бодол болсноо:

- Тэгвэл чи надад энэ их эрднэсийн алийг нь хаяж, алийг нь ирээдүйдээ үлдээх талаар сонголт хийх, бас тэгээд заримыг нь хаях, хаясан зүйлээ мартах тийм л хүч чадал хайрлаач дээ гээд цөхрөлтгүй гуйж гарчээ. Тэгсэн Бурхан бодож бодож:
- "За  яахав. Тэгвэл оронд нь би чамаас ирээдүйдээ итгэх итгэл, зориг хоёрыг чинь авлаа. Тэгж тохирох уу гэжээ. Гэтэл Уран шувуу дахин нэг хэсэг бодсоноо гэнэт чанга дуугаар:

- Өө үгүй үгүй. Ирээдүйдээ итгэх итгэлийг минь авчихвал би эдгээр эрднэсээ үүрч яваад ч яах юм билээ. Бас орхиж, хаяж, мартаад ч яах юм билээ. Юуны төлөө, хэний төлөө тэрийг хийх юм бэ.  Шал утгагүй санагдчихлаа. Ерөөсөө чамаас "Хүч чадал" гуйхаа ч болилоо. Ирээдүйдээ итгэх итгэлээ алдаагүй цагт би хаях зүйлээ зоригтой хаяж, тээж явах зүйлээ даасан шиг дааж, жинхэнэ ирээдүй рүүгээ тэмцэж чадах юм байна" гэж хөөрөн бахдан бараг нэг амьсгаагаар ярьжээ. Энэ үед Бурхан Уран шувуу хоёрын яриаг анхааралтай ажиглаж байсан Амьдрал учиргүй инээж байснаа ингэж хэлжээ.

- Эхлээд би чамайгаа юунд ингэтлээ шаналж, гунигласан юм бол доо гэж бодож байлаа. Тэгээд яриаг чинь сонсоод сууж байхдаа "Миний хайртай шувуухайд хүч чадал хайрлаач" гэж  Бурханаас бараг л гуймаар л байлаа  гэсэнд Уран шувуу:

- Хэрэггүй ээ. Надад хүч чадал хэрэггүй. Би яах ёстойгоо мэдчихлээ шүү дээ. Тэгээд ч Бурхан өгөхгүй, өгөхийг ч хүсэхгүй байгаа биз дээ  гэж гомдонгуй хэлсэнд Амьдрал:

- Миний хайр аа, Шувуухай минь ээ. Бурхан  чамд надтай л адил хайртай болохоор өгөхгүй байж чадахгүй л дээ. Тэр дөнгөж сая чамд асар их “Хүч чадал” өгчихөөд явчихлаа шүү дээ гэжээ. 

Бүсгүйчүүдийн талаар алдартнуудын хэлсэн үгс

эх сурвалж. http://www.goolingoo.mn/ сайтаас 

“Амбицтай, шийдэмгий, чадвартай эмэгтэй хүнд хийж чадахгүй зүйл гэж нэг ч үгүй” - /Элен Лоуренсон/
“Дур булаам харагдахад эмэгтэй хүнд дан ганц гоо үзэсгэлэн хангалтгүй юм. Тоглоомтой яриа, эрхлэнгүй өнгө аяс, цовоо цойлгон инээдээ ашиглаж байгалийн бэлгийг тордох хэрэгтэй” - /Петрониус/ 
“Мунхаг эр эмэгтэй хүнийг дуугүй болохыг шаарддаг. Харин ухаалаг эр эмэгтэй хүнд уруул нь жимийлттэй байхаараа ямар үзэсгэлэнтэй харагддаг тухай нь хэлдэг”
“Гучин жилийн турш эмэгтэй хүний сэтгэл рүү өнгийж явахдаа өдийг хүртэл хариултыг нь олоогүй, магадгүй хэзээ ч олохгүй ганцхан агуу нууц бол эмэгтэй хүн яг юу хүсдэг тухай юм. - /Зигмунд Фрейд/

ЗОЛИОС

Энэ өдрийн 1 цаг ирэх өдрийн 2 цагтай тэнцэнэ.  Өнөөдрөөрөө байх дуртай хүмүүс цагаа алдах тусам ирээдүйнхээ мянга мянган алтан боломжийг алдана. Тиймээс ирээдүйн алтан боломжоо алдах тэр л зүйлүүдээ оюун ухаанаасаа таягдан хаяарай. Зориг тэвчээр, сэтгэлийн тэнхээ, зорилгодоо хүрэх хүчин чармайлт чухал ч гэлээ зарим зүйлийг золиосолж амжилтанд хүрдгийг мартаж болохгүй.

Үргэлжлэл: 2011-04-30.

Хэ хэ. Сайн уу Золоо. Би эрүүл мэндээ золиослох гээгүй байна л даа. Гэхдээ хүн санаандгүй байдлаар эрүүл мэндээ золиослох тохиолдол олон байдаг. Хорт зуршил энээ тэрээгээ зоригтой хаях хэрэгтэй л дээ. За тэр яахав чиний энэ бичсэнийг хараад нээрээ золиосолж болохгүй юм гэж бас байдагийг саналаа. Юу юу байж болох вэ. Бичээрэй.

Блогийн гишүүд бичиж байна: ЭРЭГТЭЙ ЭМЭГТЭЙ ХҮМҮҮС САЙН НАЙЗУУД БАЙЖ ЧАДАХ УУ?

Сайн байна уу? Бүжээ даргаа мөн блог уншигчдаа.
Би та бүхэнд нэгэн сонирхолтой асуулга тавих гэсэн юм. Би ер өөрийгөө нийтэч хүн гэж боддог юм л даа. Бидний дунд олон сайхан бас жаахан муу найзууд бий. Эрэгтэй эмэгтэй найзууд, бас өөр найз ккк. Миний хамгийн гол асуух асуулга бол эрэгтэй эмэгтэй хүмүүс САЙН НАЙЗУУД байж чадах уу? Чадах бол хэр удаан болоо? Дараа нь би өөрт тохиолдсон явдлаа бичнээ  ккк. БАЯРЛАЛАА.

БЛОГИЙН ГИШҮҮД БИЧИЖ БАЙНА.

Ай уйдах эрхгүй залуу насаа ....
Өөрийн эрхгүй ороод ирлээ.
Юуны өмнө бидэнд бодол ухаарал, эрэгцүүлэл өгч байдаг таньд баярлалаа. Миний мэдэх цөөхөн Эмэгтэй лидер хүн шүү та. Заримдаа таныг би жаахан хатуу байж магадгүй гэж боддог юм.
Би өнгөрсөн шөнөжин нэгэн тэндерд өрсөлдөж нэлээд юм хийлээ. Маш их сурлаа. Гэхдээ хамгийн инээдтэй нь хариу нь тодорхой байлаа. тэгээд уур ч хүрэх шиг инээд хүрэх шиг сууж байна даа. Ёстой л залуу нас юм даа чи!

Бурхан бидэнд баяр баясгалан бас уйтгар гунигийг өгдөг. Энэ мөчүүдээ эргээд бодоход хэцүү цаг мөчүүд минь асуудлыг хэрхэн даван туулж бас шантарч байсан маань аз жаргал ч юм шиг аль эсвэл хөгжилтэй дурсамж ч юм шиг санагдах юм. /хагацал шаналал, өвчин эмгэгийг оруулаагүй/

БҮХ ЗҮЙЛ БУРХАН БИД ХОЁРЫН ДУНД ҮЛДЭНЭ

"Хүмүүст өөрийн чадах бүх сайн сайхнаа зориул, тэд таныг гомдоож ч магадгүй, гэвч эцэстээ тэр бүхэн зөвхөн Бурхан та хоёрын дунд үлдэнэ. Тэр бүхэн чи болон бусад хүмүүсийн хооронд болсон хэрэг биш" гэж Тереза эх нэгэнтээ хэлсэн байдаг.

ӨНГӨРСӨН ТҮҮХЭЭС ҮҮДСЭН УХААРАЛ

Өнгөрсөн түүхээ эргэн сөхөж өдрийн тэмдэглэлээ уншиж байгаад би нэг зүйлийг буруу ойлгож явснаа ухаарлаа. Зарим хүн надтай адилхан боддог байж болох юм гээд үүнийг бичихээр шийдлээ. Ээж аав хоёрыгоо би надад амьдрал хайрласан гэж бодох  тэр бодлоосоо үүдээд хоёр хүүдээ би амьдрал хайрласан л гэж боддог байлаа.
Гэтэл амьдралын жаргал, зовлонг туулж, итгэл алдарч, шаналж зовсон, тэмцэж, босож, зорьж тэмүүлсэн, санасандаа хүрч, хүссэн зүйлээ авсан тэр үеүдээ бодоход хоёр хүүгээ л бодож урагшилж байсан мөчүүд зөндөөн байж дээ. Тиймээс амин зүрхний минь шүтээн хоёр хүү  минь намайг амьдралаас уйдах эрхгүй болгож, надад шинэ амьдрал бэлэглэсэн бас нэгэн бурханы бэлэг  байжээ.
Хүн жаргалыг биш зовлонг даадаг. Өнөөдрийн жаргалтай амьдралд хүрсэн зам тийм ч дардан байгаагүй нь бас л бурханы бэлэг юм болов уу. Харин тэр бүхнийг давж туулах дундрашгүй эрч хүч надад байнга байдаг нь аз юм даа.
Тийм  эрч хүч, ухаан бодлын гайхамшигт хүч хүн бүхэнд уг нь байдаг. Тэр үнэт зүйлээ олж нээж, хайрлаж, хөгжүүлж чадах нь чухал. Эд баялаг, мөнгө, албан тушаал, хайр дурлал гээд зарим зүйлээ бид алддаг.  Зарим нь хүсээд ч ирэхгүй, зарим  хэсэгхэн хугацаанд ирээд буцахдаа хамаг итгэлийг нь авч оддог. Харин  дээр бичсэн ухаан бодлын гайхамшигт хүч, сэтгэлийн зориг тэнхээ гэдэг бол эрдэм мэдлэг, сайхан сэтгэл, нар гэрэлтсэн таны инээмсэглэлтэй адил хэн ч хэзээ ч булааж авч чадахгүй, бас тэгээд та өөрөө хүсэхгүй бол хэзээ ч таныг хаяаж явахгүй хамгийн том баялаг, үнэт эрдэнэ төдийгүй амьдрал хайрладаг бас нэгэн шидэт хүч ажээ.      

Хавар болж шувууд ирлээ.
Сайхан дуугаараа хорвоог уяараан
Дэвэн дэвэх далавчаараа хайрын мөр цацруулсаар
Хавар болж  шувууд ирлээ.
Ирэх шувуудын ганганаан
Эргэх хорвоог хайраар хөглөхөд
Цэнгэл жаргалын далайд хүслийн шуурга дэгдэж       
Сэтгэлд харин хөнгөн гуниг нөмөрлөнө.

      Сэрүүхэн тунгалаг зүүдний хорвоод

      Сэрж мэдрэх жаргалын далай цалгиж
      Ариухан хайр гунигийг хулжаан довтлоход
      Амьдрал өөрөө үлгэрээс ч сайхан санагдана.

АМЬДРАЛАА БИ ЧАМД ХАЙРТАЙ

Хүй орчлонгийн түмэн нугачаанд хүслийнхээ хөлөг онгоцыг залж, хувь тавилангаа хүн өөрөө жолооддог.  Бурхан бидний амьдралыг зурчихсан байдаг  гэж хичнээн хүн баталлаа ч би өөрөө хувь заяаныхаа эзэн байхыг хүснэ.  Амьдрал би чамд хайртай байдгийн учир нь  мөрөөдлийнхөө төлөө өөрөө тэмцэж, хүссэн бүхнээ авч санасан бүхэндээ хүрдэгт байдаг юм. 

ЗӨӨЛӨН ҮНСЭЛТ

Хайртай гэж шивнэх үгс чинь

Зүрхний минь сонорыг мялааж

Сэмхэн гэтэх зөөлөн үнсэлт чинь

Сэтгэлийн минь давалгааг эзэмдэнэ.

Халуухан тэврэлтэнд  чинь  

Хорвоо ертөнц тэр чигээрээ  багтахад

Өр зүрхэнд минь эгшиглэх хайрын нандин аялгууг

Өөрийн эрхгүй уянгалуулан дуулмаар...

Энрийлэн үнсэх зөөлөн уруул чинь сэтгэлийг минь хөгөлж

Үнсэх тоолонд зүрхэнд минь цэцэг дэлбээлнэ.

Бидэн  хоёрын ертөнц хайраар ингэж үерлэхэд

Би ганцхан чинийх байхыг хүснэ.

ӨНӨӨДӨР ЯМАР САЙХАН ӨДӨР ВЭ

Өнөөдөр ямар сайхан өдөр вэ. Цас хайлж хаврын сайхан гэрэлт тунгалаг наран ээсэн өнөөдөр үнэхээр сайхан өдөр байна даа. Би "Цагийн менежмент" хичээл орохдоо оюутнууддаа хэлдэг юм хэрэгцээтэй үед “Үгүй” гэж хэлж сур гэж. Гэвч өөрөө тэрийгээ амьдрал дээр хэрэгжүүлэх гэж нилээд зүдэрдэг. Тэгээд юм бүхнийг амжуулах гэж гүйгээд заримдаа үр дүнгүй болох тохиолдол гардаг л даа. Хүн гэдэг амьтан амьдралын зарим ачааг хаях хэрэгтэй байдаг. Эс гэвээс үүрээд л яваад байвал эцсийн буудалд хүрэх зам мөн ч бартаатай байх биз. Өнөөдөр би маш чухал нэг ажлын төлөө 2 ч хүнд “ҮГҮЙ” гэж хэлээд, хичээлээ хүртэл тасалчихаад учиргүй баяртай сууна даа. Хэ хэ. Өнөөдөр ямар сайхан өдөр вэ. Би урьд нь хэзээ ч хичээлээ хүртэл зоригтой хаяж чаддаггүй байсан юм. Яг тэрэнтэй адил нуруун дээрх зарим нэгэн ачаагаа хаячихаад сэтгэл нэг л уужим, баяртай, тэгээд бас дараагийн сонголт хийхийн өмнө алийг нь вэ гээд тунгааж сууна. Заримыг нь хаяхад тун бэрх байна л даа. Гэвч  хэн нэгэн надад “зарим АЧААГАА хэрэгцээт газар нь хүргээд хаях хэрэгтэй” гээд шивнээд байна даа. Өнгөрснөө хаяж ирээдүйгээ аварна аа хө. Гэхдээ амьдралын бартаат замыг гэрэлтүүлэгч “ХАЙР”-ын хүчийг хэрхэвч хаяж болохгүй, бусдад сайхан сэтгэл, хайр энэрэл, баяр баясгалан түгээх тэр нэгэн зүйлийг яасан ч умартаж болохгүй юм даа.

Хамгийн түрүүнд бичигдсэн нэг комментийг ил тавилаа. Үргэлжлүүлээд бичээрэй хүмүүсээ.

Золоо: Хэ хэ нээрээ ч үгүй гэж хэлэх хэцүү шүү. сайхан өдөр байна даа. Яг одоо үгүй гэж хэлээгүйгээсээ болоод нэг хүнийг гомдоочоод сууж байна даа. Ажил + ажил + ажил + асуудлууд. Кк хэний төлөө вэ бас юуны тулд вэ. Хавар болж байна даа, кк бөөн зөрчил байна даа.

Их сонин үгүй гэхээр тийм болгохоор зүтгэдэг хүмүүс байдаг тээ

March 9, 2011 2:18 PM

Хүн аливааг хичнээн бага мэдэх тусмаа тэр чинээгээр сэжигч хардамтгай байдаг. Бекон

ГЭГЭЭН ВАЛЕНТИНИЙ ӨДӨРТ

Цаг агаарын элдэв өөрчлөлт, оршин сууж буй газар орон, үндэс угсаа үл харгалзан сая, сая дурлалт хосууд баярын энэ өдрийг тэмдэглэхдээ гэгээн Валентиний өдөр хэмээн нэрлэдэг. Энэ баярыг эрт цагаас эхлэн тэмдэглэж байсан боловч V-р зууны үеэс өргөн тэмдэглэдэг болж мал сүрэг, ой мод, уудам та үржил шимтэй тариалан талбайг ивээн тэтгэгч Фавк бурханд зориулсан эртний Римийн Люперкаль бурханы баяраас уламжлан үүсчээ. Хоёрдугаар сарын 14-ний өдрийг шувууд дурлалт хосоо, амьдралын хосоо сонгон олдог учраас энэ өдрийг “Шувуудын хуримын” өдөр ч гэж нэрлэх болж. Энэ өдөр охид хүүхнүүд өөрийн нэрийг цаасан дээр бичиж хайрцагт хийнэ, тэр хайрцгийг залуучууд задалж аль нэг эмэгтэйн нэр бүхий бичгийг сугалан авч үүрдийн ханиа сонгодог энэ хөгжилтэй баярыг олон оронд тэмдэглэдэг болжээ. Эртний Римийн эзэн хаан Клавдий 2 гэгч машид харгис нэгэн хаан 270 онд төр барьж байсан хэцүү цөвүүн тэр цагт цус урсгасан их дайн нь ямар ч амжилт олохгүй байсан тул хаан ихэд бухимджээ.

ХАЙРЛАН ДУУЛМААР БАЙНА

17 дугаар жарны илжиг хэмээх төмөр туулай жилийн шинийн 5 ны шинэхэн цастай энэ сайхан өдрийн мэндийг миний блогийг үзэж суугаа эрхэм таньд хүргэе. Ариухан гэгээлэг бүхний бэлэгдэл болсон шинэхэн цас гишгэж боломгүй хайрламаар байлаа. Тэгээд гэнэт энэ хорвоогийн бүх сайхан сэтгэлт хүмүүст энэ дууг зориулмаар санагдлаа.

“Цас хүнд дурлажээ. Нэгэн бүсгүй цонхон дээрээ. Цонхны цаана будрах цас. Бүсгүйн нүд хөгжилтэй. Тэр инээмсэглэн будрах цасыг ажина. Бүр ширхэг бүрийг алдалгүй харахыг хичээнэ. ”Тийм баяртай инээмсгэлэл, гэрэлтсэн харц. Яг тэндээсээ битгий холдоосой. Намайг гайхан бишрээсэй гэж цас бодлоо. Тэгээд цас яг л дуралж үзээгүй залуу хүн шиг өөрийн чаддаг бүхнээ бүсгүйд гайхуулахаар шийдэв. Зөөлөн будрах цас төдөлгүй том томоор малгайлан орж эхлэв. Бүсгүй салхивчаар цээжээ гаргаж, хөөрхөн цагаан хуруунуудаараа цасыг тослоо. Цас хамгийн том, хамгийн ганган ширхэгүүдээ бүсгүйн алган дээр буулгав. Харамсалтай нь тэд бүсгүйг харж ч амжаагүй байхад хайлан алга болно. Тэр бүсгүй өөрийг нь хайлуулж чадах шидтэйг цас ингэж мэдэв” Эх сурвалж. Uran20.delhii.net

Ангийн анд Цэцэгсүрэнд Отгонцэцэгээс бичсэн захидал.

Би чамайг манай ангийн хамгийн ажилсаг охин гэж боддог. Өглөө болгон халуун саванд чи л ус дүүргэж байгаа харагддаг.Нэг удаа би цүнхээ ард талдаа тавиад их л эвгүй сууж байтал: “Отгоо эгчээ та цүнхээ энд тавих уу “ гээд миний цүнхийг аваад хажуудаа байгаа сандал дээр авч тавьж билээ. Тэгэхэд би бусдыгаа гэсэн сайхан сэтгэлтэй охин байна даа гэж бодож билээ.Чамд ангийнхаа хамт олны өмнөөс амжилт хүсээд баярллаа гэж хэлье.

БАГШ НАРЫН БАЯРЫН ХАЛУУН МЭНД ХҮРГЭЕ

Оюутны ширээнээс дөнгөж төрсөн нялх, түүхий судлаачийг өлгийдөн авч ажил амьдралын минь гарааг эхлүүлсэн Боловсролын хүрээлэнгийн захирал, ачит багш доктор профессор Н.Бэгз болон 10 жил эрдмийн аянд хамт зүтгэсэн Боловсролын хүрээлэнгийн эрдэмтэн, судлаач багш, найзууддаа

Улс төрийн Боловсролын Академи, түүний салбарууд, "Либерти", "Боловсрол", "Засагт Хан" дээд сургуулийн багш нар, эрдмийн зөвлөлийн гишүүддээ

БАГШ НАРЫН БАЯРЫН ХАЛУУН МЭНД ХҮРГЭЕ.

Эрдэм түгээх их үйлсэд хөдөлмөр зүтгэл, сэтгэл оюунаа зориулсан Монголын багш нарын

ЯРУУ АЛДАР БАДАРТУГАЙ.

ҮНЭГҮЙ ЗҮЙЛ ЗӨВХӨН ХАВХАНД Л БАЙДАГ

Хулгана  хоолоо олж идэхээр өдөр шөнөгүй хөдөлмөрлөхдөө амьдралаас олон зүйлийг суралцаж, өөрийн гэсэн ертөнц, үнэт зүйлийг бүтээдэг. Гэвч үнэгүй юманд дурлаж зүтгэхээрээ  амьдралын зорилго, үнэт зүйлсээ алддаг байна. Харин хулганын дурлаж зүтгэсэн үнэгүй бөгөөд амтат бяслаг зөвхөн хавханд л байдаг ажээ.    

НАМАЙГ ТӨРҮҮЛСЭН ЭЭЖ ААВ ХОЁРТОО

Өнөөдөр миний төрсөн өдөр. Энэ хорвоод эрдэнэт биеийг минь төрүүлсэн ээж аав хоёртоо хамгаас их хайртай гэж энэ өдөр хэлмээр байна. Та хоёр минь эрүүл энх урт удаан наслаж үр биднийгээ үүрд ивэж яваарай гэж хүсье. Ийм мөнхийн хүсэл хүн бүрт л байдаг байх даа.  Бяцхан охиныхоо уйлах чимээнээр ээж, аав гэдэг эрхэм алдрыг хүртэж 19 хөн настай аав ээж болохдоо хязгааргүй их жаргалтай байсан гэж ээж аав минь ярьдаг юм. Нээрээ л би төрсөн тэр өдрөө л ээж ааваа нэг баярлуулж дээ. Түүнээс хойш одоо ч гэсэн эмээ өвөө болгочихоод аав ээжээ зовоосоор л явна.
Аав ээж хоёр маань гэр бүл болоод намайг төрүүлэхэд нь хүмүүс хоёр жоохон хүүхэд суугаад хүүхэдтэй болж байна гэж ярьж байсан гэдэг. Удалгүй аавыг маань цэрэгт татах болоход ээж бид 2-ийг орхиод явж чадалгүй аав маань цэргийн албанаас зугатаахаар шийдэж, нэг ч таних хүнгүй Архангай аймаг руу гэрээ ачаад нүүсэн гэдэг. Замдаа явж байтал нь машин нь эвдрээд 3 дахь хоног дээрээ арга буюу ээж бид 2-ийг замын машинаар явуулж л дээ. Ээж маань намайг дагуулаад  замын жолооч ахаас гуйж таних айл байхгүй нөхрөө иртэл танайд хүлээж байя гэж гуйгаад тэр айлд бүтэн сар аавыг хүлээсэн гэдэг. Тэгээд өдөр бүр намайг дагуулаад  зам дээр очоод суудаг эсвэл хашаан дээр гарч суугаад л зам ширтэж өнждөг байсан гэж ярьдаг юм. Нэг өдөр тэгж хашаан дээр сууж зам ширтэж байгаад хажуу тийшээ харсан чинь би байхгүй байж гэнэ. Гайхаад хартал уначихсан газар хэвтэж байсан гэдэг. Тэгээд духандаа шарх авсан миний шархыг аавыг ирэхээс өмнө яаж эдгээх вэ гээд л хамаг аргаа барж, нэг сарыг өнгөрөөсөн гэдэг юм. Тэр шарх одоо ч гэсэн миний духанд байдаг. Харин хүмүүс үрчлээс гэж боддог л доо. Толинд харах болгондоо би энэ түүхийг санадаг юм. Тэгээд төрсөн өдрөөрөө блогтоо бичиж та бүхэнд хүргэж байна. 
Хүмүүс надад ямар нэгэн байдлаар баярлаж, талархснаа хэлэхэд би ээж, аавыг аа боддог юм. Багшийг маань төрүүлж, бидэнд илгээсэнд баярлалаа гэж миний олон шавь нар  Та хоёрт минь мөргөн залбирдаг юм шүү.  Энэ дэлхийн сайхан сэтгэлт хүмүүст нэгэн анд  төрүүлж,  энэ хорвоод  эрдэнэт нэг хүнийг бэлэглэсэн энэ өдрийн баярыг та хоёртоо хүргэе.

Амин зүрхний минь хоёр нандин шүтээнийг

Алтанхан хорвоод бэлэглэсэн хүйн нандин холбоо 

Аав ээжээс минь эхтэй.

ХҮЙН ГУРВАН ХОЛБООС

/Аав ээж, хүүдээ зориулах шүлэг/

Үр минь чинийхээ төлөө үхтлээ шаналахдаа би

Өрлөг хатан ээжийнхээ өтөлсний учрыг мэдлээ.

Хүүгийнхээ төлөө би зүрхэн нулимс унагахдаа

Хөөрхий муу аавынхаа хөгширсний учрыг мэдлээ.

Уйлж инээсний минь ороор нүдний минь буланд нуугдах

Эгэл хэдхэн зураасыг тольдож суухдаа би

Төрүүлж өсгөсөн аавыгаа зовоож, шаналгаж  ханалгүй

Түмэн үрчлээт зургийг нүүрэнд нь урласнаа ухаарлаа.  

Золбоолог төрсөн ээжийнхээ

Залуу сайхан насыг

Үрж дуусгасан хүн нь
Би юм шүү хүү минь. 

Хат суусан аавынхаа

Нулимсан дуслыг бөмбөрүүлж,

Зүрхийг нь өмөлсөн хүн нь
Би юм шүү хүү минь.
Үрийнхээ төлөө эх хүн өөрийгөө үрж дуусдагийг
Хүүгийнхээ төлөө эцэг хүн хичнээн тэвчээрээ бардгийг
Хүү минь чи ухаараарай.

Бурханы хишгээр төрүүлсэн хоёр хүүгийнхээ төлөө

Хайр энэрлээ дийлэхгүй сэтгэлдээ шаналж суухдаа

Хорвоод чухам хэнд өртэйгээ дахин ухаарлаа ээж нь.

Амин зүрхний минь хоёр нандин шүтээнийг

Алтанхан хорвоод бэлэглэсэн хүйн нандин холбоо 

Аав ээжээс минь эхтэй.

Зөрмөгхөн хорвоод эгэл биеийг минь төрүүлж,

Жаргал зовлонг даах эрдэм чадлыг заяасан

Жаранг элээсэн ээж аав хоёрыгоо

Жаргаах цаг байна уу ээжид нь

Энхрий хоёр нандин үр минь ээжийгээ л баярлуулж байвал

Эмээ өвөө хоёрыг чинь жаргааж чадах нь ээ ээж нь

Ээжийнхээ мэндэлсэн энэ л өдрөөр чи

Эмээ өвөөдөө мөргөх ёстой шүү хүү минь.